Малапа — пячора ў Паўднёва-Афрыканскай рэспубліцы. Знаходзіцца ў правінцыі Гаутэнг на вышыні 1442 м над узроўнем мора, у 40 км на захад ад Яганэсбургу і ў 15 км на поўначы—паўночным ўсходзе ад вядомых выкапневых участкаў Стэркфантэйн, Сварткранс і Кромдрай. Пячора адносіцца да тэрыторыі аб’екта Сусветнай спадчыны ЮНЕСКА, вядомага як «Калыска чалавецтва».
Вясной 2008 года ў пячоры былі знойдзены рэшткі двух шкілетаў гамінід узростам прыкладна 1,9 мільёнаў гадоў, выдзеленыя ў асобны від роду аўстралапітэкаў Australopithecus sediba[1][2]. Вядомы антраполаг Дональд Джохансан лічыць, што косткі A. sediba варта аднесці да роду Homo[3]. Тут жа знойдзены самыя раннія знаходкі парэшткаў бабуінаў Papio angusticeps узростам 2,026—2,36 млн гадоў [4].