Лі Сунджа (кар.: 이순자; нар. 24 сакавіка 1939, Чанчунь, Маньчжоу-Го, Японская імперыя) — першая лэдзі Паўднёвай Карэі (1 верасня 1980 — 24 лютага 1988).
Пасля здабыцця Карэяй незалежнасці ад японскага валадарства ў 1945 годзе з сям’ёй вярнулася на Карэйскі паўвостраў. Яе бацька быў афіцэрам паўднёвакарэйскай арміі і ўдзельнічаў у Карэйскай вайне.
У 1957 годзе вывучала медыцыну ў жаночым універсітэце Іхва, але адмовілася ад сваёй мары стаць урачом і ў 1958 годзе выйшла замуж за афіцэра Чон Ду Хвана, які стаў у 1980 годзе Прэзідэнтам Паўднёвай Карэі.
Пазней скончыла Універсітэт Ёнсэ.
Суправаджала мужа на ўсіх публічных мерапрыемствах. Праяўляла вялікую цікавасць да пытанняў адукацыі і ўнесла істотны ўклад у развіццё дашкольнай адукацыі і дзіцячай кардыяхірургіі.
У 1980-х гадах, калі ў Паўднёвай Карэі пачаўся пераход з чорна-белага на каляровае тэлебачанне, першая лэдзі, якая апраналася ў пышныя касцюмы і традыцыйныя сукенкі, выклікала ў карэйцаў гонар за краіну. Пазней, калі Чон Ду Хван быў ва ўладзе, экстравагантныя паводзіны Лі Сунджа сталі сацыяльнай праблемай і падвергліся крытыцы з боку паўднёвакарэйскага грамадства.
Пасля адстаўкі з пасады прэзідэнта мужа Чон Ду Хвана сям’я апынулася ў няміласці. Іх падазравалі ў карупцыі. 23 лістапада 1988 года разам з мужам была вымушана пасяліцца ў будыйскім манастыры Пэктамса, дзе правяла два гады. У маі 2006 года Лі была выкліканая ў Цэнтральнае следчае ўпраўленне Паўднёвай Карэі па падазрэнні ў валоданні незаконнымі зберажэннямі на суму каля 13 мільярдаў вон. Пры гэтым сям’і ўсё яшчэ трэба будзе выплаціць гіганцкую суму ў $ 370 млн, скрадзеную Чон Ду Хванам у свой час з бюджэту краіны. Сям’я Лі і Чона да гэтага часу выплачвае гэты доўг.