У гэтага паняцця ёсць і іншыя значэнні, гл. Ківу (значэнні).
Кі́́ву — возера ў Цэнтральнай Афрыцы, на мяжы паміж Руандай і Дэмакратычнай Рэспублікай Конга ў Вялікай рыфтавай даліне, адно з Вялікіх Афрыканскіх азёр.
Плошча паверхні возера роўная прыкладна 2700 км². Зрэз вады знаходзіцца на адзнацы 1460 метраў над узроўнем мора. Азёрная катлавіна размешчана ў рыфтавай даліне, якая паступова пашыраецца. Утварылася ў выніку запруджвання лававымі патокамі старажытнай рачной сістэмы[1]. Найбольшая глыбіня возера складае 480 (496[2]) метраў (16 месца па глыбіні ў свеце). Берагі стромкія, моцна парэзаныя[1]. Возера акружана гарамі. Ківу мае сцёк праз раку Рузізі, якая цячэ ў паўднёвым кірунку і ўпадае ў возера Танганьіка. На паўднёвым беразе возера знаходзіцца горад і порт Букаву[3].
Найбуйнейшы азёрны востраў Іджві займае плошчу 340 км².