«Купа́ла і Ко́лас. Два я́блыкі на адно́й галі́нцы» — беларускі дакументальны фільм, створаны па загадзе Міністэрства культуры Рэспублікі Беларусь «Беларускім відэацэнтрам» у 2013 годзе.[1]
Янка Купала і Якуб Колас – сучаснікі, паплечнікі, равеснікі; сваімі творамі яны ўзнялі беларускую літаратуру на сусветны ўзровень, выявілі незвычайную сілу і творчую магутнасць беларускага слова. Гэтыя сапраўды народныя паэты выказалі беларускую нацыянальную самасвядомасць, народныя пачуцці, шырока раскрылі нацыянальны характар, асаблівасці духоўнага складу і жыцця беларусаў. Янка Купала – пераважна рамантык, Якуб Колас – рэаліст. Лірыка Янкі Купалы – гэта лірыка прарока, прадказальніка. Лірыка Якуба Коласа – перажыванні рэальнага, канкрэтнага чалавека. Гістарычная заслуга Купалы і Коласа ў тым, што яны стварылі сапраўдныя шэдэўры нацыянальнага мастацтва і тым самым узнялі беларускую літаратуру да ўзроўню перадавых літаратур свету, зрабілі яе агульнанароднай з’явай. Фільм расказвае пра тое, што звязвала народных паэтаў Беларусі і што іх раз’ядноўвала.