Крысціян Парш (венг.: Krisztián Pars; нар. 18 лютага 1982, Сентготхард, Ваш) — венгерскі лёгкаатлет, кідальнік молата. Прадстаўляў сваю зборную на чатырох Алімпіядах — у 2004, 2008, 2012 і 2016 гадах. Сярэбраны прызёр чэмпіянату свету 2011 у Тэгу і чэмпіянату свету 2013 года ў Маскве. Чэмпіён Еўропы 2012 года ў Хельсінкі і 2014 года ў Цюрыху. Чэмпіён Алімпійскіх гульняў 2012 года ў Лондане.
Свой асабісты рэкорд Парш усталяваў 13 верасня 2006 года ў Цэле, Славенія. Снарад, пушчаны спартсменам, даляцеў да адзнакі 82,45 м. Парш таксама валодаў сусветным рэкордам сярод юніёраў, кінуўшы молат вагай 6 кг на 81,35 м у 2001 годзе ў Сомбатхеі, Венгрыя.