Каралін Рут Бертоцы (англ.: Carolyn Ruth Bertozzi, нар. 10 кастрычніка 1966 года, Бостан, ЗША) — амерыканскі вучоны-хімік. Лаўрэат Нобелеўскай прэміі па хіміі 2022 года.
Прафесар Стэнфардскага ўніверсітэта, былы дырэктар Molecular Foundry, нанатэхналагічнага даследчага цэнтра ў Нацыянальнай лабараторыі імя Лоўрэнса ў Берклі. Член Нацыянальных Акадэміі навук (2005) і Медыцынскай акадэміі (2011) ЗША, Леапальдзіны (2008), замежны член Лонданскага каралеўскага таварыства (2018). Каралін Бертоцы атрымала вялікую колькасць узнагарод, якія сведчаць аб яе дасягненнях у навуковай дзейнасці. Ва ўзросце 33 гадоў атрымала стыпендыю Мак-Артура. У 2010 годзе стала першай жанчынай, якая атрымала прэстыжную ўзнагароду — прэмію Лемельсана.