Джын Артур (англ.: Jean Arthur, сапраўднае імя Глэдзіс Джарджыяна Грын, англ.: Gladys Georgianna Greene; 17 кастрычніка 1900 — 19 чэрвеня 1991) — амерыканская актрыса, адна з вядучых камедыйных актрыс у 1930—1940 гадах. Джэймс Харві пісаў у сваёй кнізе пра яе эпоху: «Ніхто не быў звязаны так шчыльна з эксцэнтрычнай камедыяй як Джын Артур. Яна была настолькі часткай усяго гэтага, настолькі яе статус зоркі вызначаўся гэтым, што сам стыль эксцэнтрычнай камедыі без яе проста цяжка ўявіць».
Джын Артур больш за ўсё запомнілася па ролях у фільмах Фрэнка Капры «Містэр Дыдс пераязджае ў горад» (1936), «З сабой не панясеш» (1938) і «Містэр Сміт едзе ў Вашынгтон» (1939). Яе апошняя роля ў фільме Джорджа Стывенса «Шэйн» (1953) была вельмі яркай і запамінальнай.