У Вікіпедыі ёсць артыкулы пра іншых асоб з прозвішчам Бердымухамедаў.
Гурбангулы Мяліккуліевіч Бердымухамедаў (туркм.: Gurbanguly Mälikgulyýewiç Berdimuhamedow; 29 чэрвеня 1957 г., Бабарап, Геак-Цепінскі раён, Ашгабадская вобласць, Туркменская ССР, СССР) — туркменскі дзяржаўны дзеяч, з 2007 па 2022 гады — Прэзідэнт Туркменістана. Генерал арміі.
Нарадзіўся 29 чэрвеня 1957 года ў сяле Бабарап Геак-Цепінскага раёна Ашгабадскай вобласці Туркменскай ССР.
У 1979 годзе скончыў стаматалагічны факультэт Туркменскага дзяржаўнага медыцынскага інстытута, затым аспірантуру. Доктар медыцынскіх навук, прафесар па спецыяльнасці «Сацыяльная гігіена і арганізацыя аховы здароўя». Працоўную дзейнасць пачаў у 1980 годзе ўрачом-стаматолагам. У 1990—1995 гг. — асістэнт кафедры тэрапеўтычнай стаматалогіі, дацэнт, дэкан стаматалагічнага факультэта Туркменскага дзяржаўнага медыцынскага інстытута. У 1995—1997 гг. — дырэктар стаматалагічнага цэнтра Міністэрства аховы здароўя і медыцынскай прамысловасці Туркменістана.
З 1997 года — Міністр аховы здароўя і медыцынскай прамысловасці Туркменістана. З 2001 года — намеснік Старшыні кабінета міністраў Туркменістана. У лістападзе 2006 года прадстаўляў Туркменістан на саміце СНД у Мінску.
У 2007—2022 гадах — Прэзідэнт Туркменістана. Прыйшоў да ўлады пасля смерці Сапармурата Ніязава. Затым яшчэ двойчы перамагаў на прэзідэнцкіх выбарах. У 2021 годзе прызначыў сына Сердара віцэ-прэм’ерам і на шэраг іншых ключавых пазіцый ва ўрадзе. У 2022 годзе ініцыяваў нечарговыя прэзідэнцкія выбары.