Георг Хендрык Брэйтнер (12 верасня 1857, Ротэрдам — 5 чэрвеня 1923, Амстэрдам) — галандскі жывапісец. Вучыўся ў АМ у Гаазе (1875-77) і Амстэрдаме (1886). Выпрабаваў уплыў імпрэсіянізму. Пісаў пейзажы, партрэты, бытавыя сцэны, аголеную натуру. Карціны Брэйтнера адрозніваюцца вострай характэрнасцю вобразаў, тонкасцю настрою, свабодным пластычным мазком, выразнасцю святлоценявых кантрастаў і нюансаў. Брэйтнер часта пісаў віды амстэрдамскіх вуліц, напоўненых шумам і рухам або ціхіх і пустынных, у розную пару года («Будаўніцтва ў Гэй», 1897, «Браўэрсграхт пад снегам», 1901, — у Гарадскім музеі, Амстэрдам).