wd wp Пошук: ⬜

Вірыдзіс Вісконці

У Вікіпедыі ёсць артыкулы пра іншых людзей з імем Вердэ.

Вердэ ці Вірыдзіс Вісконці (1352, Мілан — да 11 сакавіка 1414) — прадстаўніца дому Вісконці, дачка міланскага кіраўніка Бернабо Вісконці і Беатрычэ Рэджыны, дачкі Масціна II дэла Скала.

У 1365 бацька выдаў Вердэ за герцага Аўстрыі Леапольда III з дынастыі Габсбургаў, заснавальніка леапальдзінскай лініі. У той час Вісконці патрабавалася дапамога Габсбургаў у барацьбе з Карарэзі за кантроль над Фельтрэ і Белуна. Пасаг быў прызначана ў памеры ста тысяч флорынаў. Вясельныя ўрачыстасці праходзілі ў палацы Бернабо каля царквы Сан-Джавані-ін-Конка.

Пасля заключэння шлюбу стала герцагіняй Аўстрыі, Штырыі і Карынтыі, графіняй Ціроля. У шлюбе нарадзіліся:

Вільгельм (1370—1406), герцаг Аўстрыі
Леапольд IV (1371—1411), герцаг Аўстрыі
Эрнст (1377—1424), герцаг Аўстрыі
Фрыдрых IV (1382—1439), герцаг Аўстрыі
Лізавета (1378—1392)
Катарына (нар. 1385), абатыса манастыра Св. Клары ў Вене.

Заўдавела ў 1386 годзе, і іх старэйшы сын Вільгельм стаў герцагам Аўстрыі. Па некаторых звестках, пахавана ў царкве сяла Сцічна ў Славеніі. З яе бібліятэкі паходзіць багата ўпрыгожаны мініяцюрамі манускрыпт медыцынскага трактата Tacuinum Sanitatis.

Зноскі

↑ Lundy D. R. Viridis Visconti // The Peerage Праверана 9 кастрычніка 2017.

Літаратура

Lexikon der Geschichte. Gütersloh / München 1998, ISBN 3-572-01285-6

Спасылкі

На Вікісховішчы ёсць медыяфайлы па тэме Вірыдзіс Вісконці