Вялікі камень Бортніцкі — валун з ружовага граніту памерамі 5,45 х 3,2 м, вышынёй 1,25 м ляжыць каля в. Багушэвічы Пліскага сельсавета побач з засценкам Бортнікі і з’яўляецца самым вялікім сярод тых, што зарэгістраваны ў Глыбоцкім раёне.
Існуе паданне, што яго восі накіраваны на месца, дзе на глыбіні 30 футаў закапана 6 бочак з каштоўнасцямі на сем мільёнаў франкаў. Гэтыя каштоўнасці быццам былі нарабаваны салдатамі французскай арміі ў час вайны 1812 г. Усяго бочак было сем, але адну салдаты разбілі і каштоўнасці распіхалі па кішэнях.