Вялі́кае Гаро́дна — возера ў Гарадоцкім раёне Віцебскай вобласці ў басейне ракі Чарнец.
Плошча паверхні 0,24 км². Даўжыня 0,88 км, найбольшая шырыня 0,38 км, даўжыня берагавой лініі 2,12 км. Плошча вадазбору 1,25 км².
Катлавіна возера лагчыннага тыпу, выцягнутая ў напрамку з захаду на ўсход. Схілы катлавіны стромкія, вышынёй да 18 м, у паўднёвай частцы возера спадзістыя, вышынёй да 2 м. Берагавая лінія слабазвілістая. Берагі зліваюцца са схіламі катлавіны. У паўднёвай частцы возера берагі нізкія. Дно возера выслана сапрапелем.
Возера слабапраточнае. Упадаюць ручаі, выцякае пратока ў возера Малое Гародна.