Войты — возера ў Браслаўскім раёне Віцебскай вобласці. Знаходзіцца за 15 км на поўнач ад горада Браслаў, за 1,5 км на ўсход ад вёскі Краснагорка, у басейне ракі Друйка. Знаходзіцца на тэрыторыі нацыянальнага парка «Браслаўскія азёры».
Плошча паверхні 0,2 км². Даўжыня 0,8 км, найбольшая шырыня 0,44 км. Найбольшая глыбіня 1,8 м, сярэдняя — 0,9 м. Даўжыня берагавой лініі 2,7 км. Аб’ём вады ў возеры 0,18 млн м³. Плошча вадазбору 3,1 км².
Катлавіна возера тэрмакарставага тыпу. Схілы катлавіны спадзістыя, разараныя, на ўсходзе пад хваёвым лесам. Берагі (акрамя паўднёвага і асобных участкаў паўночнага) нізкія, сплавінныя. Вакол возера пойма шырынёй 200—500 м. Да ўсходніх і заходніх берагоў прымыкае балота. Дно плоскае, выслана сапрапелем. 2 астравы агульнай плошчай па 0,2 га. Возера дыстрофнае, зарастае. Сцёк па ручаі ў возера Снуды. Упадаюць меліярацыйныя каналы.