Барвінок — возера ў Браслаўскім раёне Віцебскай вобласці, на мяжы з Латвіяй. Знаходзіцца за 22 км на паўночны ўсход ад горада Браслаў, за 3,5 км на ўсход ад вёскі Шамялі, у басейне ракі Друйка. Належыць да Абабіцкай групы азёр і знаходзіцца на тэрыторыі Нацыянальнага парка «Браслаўскія азёры».
Плошча паверхні 0,08 км². Даўжыня 0,37 км, найбольшая шырыня 0,37 км. Даўжыня берагавой лініі 1,15 км.
Размешчана сярод лесу. Схілы катлавіны вышынёй 7—10 м. На поўначы ўпадае ручай з возера без назвы, на поўдні выцякае ручай у возера Берца.