У Вікіпедыі ёсць артыкулы пра іншых асоб з прозвішчам Чурыла. Адам Чурыла (7 мая 1911 — 24 жніўня 1972) — беларускі грамадскі дзеяч у Аўстраліі.
Нарадзіўся 7 мая 1911 г. у вёсцы Круты Бераг Мінскай губерні ў Расійскай імперыі. Да 1932 г. працаваў у бацькі на гаспадарцы, далей служыў у польскім войску.
У 1939 г. удзельнічаў у польскай абарончай кампаніі, пазбегнуў палону і вярнуўся дадому. У 1944 г. апынуўся ў Германіі.
У 1948 г. выехаў у Аўстралію. Актыўна ўдзельнічаў у арганізацыі беларускага жыцця ў Сіднеі на пачатку 1950-х гг. Падчас расколу на «крывічоў» і «зарубежнікаў» заняў прынцыповую пазіцыю супраць падзелу. Праз некаторы час далучыўся да арганізацыі «незалежнікаў» у Сіднеі. У 1967 г. падтрымліваў аб’яднаўчыя ініцыятывы і наступнае стварэнне Беларускага культурна-грамадскага клуба. Не меў уласнай сям’і, але здолеў за час жыцця ў Аўстраліі заашчадзіць добрыя грошы і, паводле тастаменту, пакінуў адзін са сваіх дамоў Беларускаму культурна-грамадскаму клубу.
Памёр 24 жніўня 1972 г. Пахаваны ў Сіднеі на беларуска-украінскай секцыі могільніка Руквуд.
На перавыбарах 1979 г. Міхась Зуй сказаў: «Пакойнік Адам Чурыла даў добры прыклад для беларускага грамадства, ахвяраваўшы частку сваёй маёмасці на агульную беларускую справу». Такім чынам, дзякуючы яму ў Сіднеі з’явіўся Беларускі дом[1].