Абрахам Пайс (англ.: Abraham Pais; 19 мая 1918, Амстэрдам, Нідэрланды — 28 ліпеня 2000, Капенгаген, Данія) — амерыканскі фізік-тэарэтык і гісторык навукі галандскага паходжання. Навуковыя працы Пайса прысвечаны пытанням ядзернай фізікі, фізікі элементарных часціц, квантавай тэорыі поля: у ліку яго асноўных дасягненняў ідэя асацыятыўнага нараджэння дзіўных часціц, тэорыя змяшаных станаў часціц і іх асцыляцый, ён таксама ўвёў тэрміны «лептон» і «барыён». Пайс з’яўляецца аўтарам шэрагу прац па гісторыі фізікі, у тым ліку папулярных біяграфій Эйнштэйна, Бора і Опенгеймера.