wd wp Пошук: ⬜

Яфім Сямёнавіч Мінін

У Вікіпедыі ёсць артыкулы пра іншых асоб з прозвішчам Мінін. Яфі́м Сямёнавіч Мі́нін (8 кастрычніка 1894 або 21 кастрычніка 1897, Віцебск — 29 снежня 1937 [1], Віцебск, НКУС) — беларускі мастак.

Біяграфія

Вучыўся ў Політэхнічным інстытуце ў Петраградзе (1916—1918), потым у Школе жывапісу і малюнка Іегуды Пэна ў Віцебску. Выкладаў у Віцебскім мастацкім вучылішчы (1920—1937).

Займаўся гравюрай, жывапісам, ілюстраваў кнігі.

У 1933 годзе ў часопісе «Мастацтва і рэвалюцыя» і іншых выданнях з’явіўся артыкул «Аб рэцыдывах нацыянал-дэмакратызму ў творчасці мастака Мініна[2]» аўтарства Віталя Зэйдэль-Вольскага. У тэксце даводзілася, што Мінін займаецца класавым шкодніцтвам.

Віталь Зэйдэль-Вольскі пісаў: “Экслібрыс, зроблены для Шлюбскага, характэрны сваім голым этнографізмам. У цэнтры яго знаходзіцца курган. З левага боку кургана сядзіць стары селянін і грае на цымбалах. На кургане сядзіць таксама стары і грае ў дуду. Побач з ім яшчэ адзін стары ў саламяным капялюшы стаіць і грае на трубе. Нацдэм Шлюбскі з задавальненнем знаходзіў у гэтых экслібрысах работы Мініна яскравыя адбіткі беларускага «нацыянальнага адраджэння»”.

Арыштаваны 1.11.1937 г. у Віцебску па адрасе: вул. 1-я Ветэрынарная, д. 34. Асуджаны 19.11.1937 асобай нарадай пры НКВД СССР як «член ПАВ» да ВМП. Расстраляны ў Віцебску. Рэабілітаваны ваенным трыбуналам БВА 19.5.1958. Групавая справа М. і іншых № 4105-П захоўваецца ў архіве УКДБ Віцебскай вобласці.

Творы

«Стары Віцебск» (1926-28, серыя дрэварытаў)
«Помнікі драўлянага дойлідства Беларусі» (1927-28, серыя дрэварытаў)
«Вайна» (1932)
«Цэх Віцебскай фабрыкі акуляраў» (1935, алей)
экслібрысы

Творы захоўваюцца ў Віцебскім абласным краязнаўчым музеі, Нацыянальным мастацкім музеі Беларусі ў Мінску, ДМВМ у Маскве. Экслібрысы Мініна экспанаваліся на выстаўцы Міжнароднага таварыства кніжнага знака (1928, Лос-Анджэлес).

Літаратура

Шматаў В. Ф. Беларуская графіка 1917—1941 гг., Мн., 1975
Ю. М. Пэн, Научно-популярное издание, Мн., 2006, С.173
Энцыклапедыя літаратуры і мастацтва Беларусі: У 5-і т. Т. 3. Карчма — Найгрыш / Рэдкал.: І. П. Шамякін (гал. рэд.) і інш. — Мн.: БелСЭ, 1986. — 751 с. — 9500 экз.
Белорусская ССР: Краткая энциклопедия. В 5-ти т. Т. 5: Биографический справочник / Редкол. И. П. Шамякин (гл. редактор) и др. — Мн.: БелСэ им. П. Бровки, 1981. — Т. 5. — 740 с., ил. — 50 000 экз.

Зноскі

↑ Спісы ахвяр Крыніца: Беларускі «Мемарыял»
↑ https://files.knihi.com/Knihi/Pieryjodyka/Viciebski_proletary.zip/1933-021.pdf

Спасылкі

МІНІН Яўхім (Яфім) Сямёнавіч/ Рэпрэсаваныя літаратары, навукоўцы, работнікі асветы, грамадскія i культурныя дзеячы Беларусі. 1794—1991. Леанід Маракоў
Минин, Ефим Семёнович // Віцебская энцыклапедыя
МИНИН Ефим Семенович // Расійская Яўрэйская Энцыклапедыя