Цыка́ды (Cicadidae) — сямейства цыкадавых клаповых насякомых.
Галава кароткая, вочы моцна вылупленыя, на цемені 3 простых вочка, якія ўтвараюць трохкутнік; кароткія щацінападобныя вусікі складаюцца з 7 суставаў; ротавыя часткі складаюцца з трохсустаўнага хабатка.
Пярэднія крылы даўжэшыя за заднія, крылы збольшага празрыстыя, часам ярка афарбаваныя або чорныя; сцёгны сярэдняй пары ног кароткія і шырокія, пярэднія сцёгны патоўшчаныя, знізу з шыпамі; галёнкі цыліндрычныя.
Брушка звычайна даволі тоўстае і заканчваецца ў самак яйцакладам, у самцоў капуляцыйным апаратам. Надзвычай характэрным з’яўляецца прысутнасць у самцоў цыкад асаблівага галасавога апарату. Ён змяшчаецца на ніжням баку заднягрудзей, ззаду задніх ног, пад двума вялікімі паўкруглымі лускавінкамі; гэты апарат складаецца з сярэдняй і двух бакавых паражнін. На дне сярэдняй паражніны знаходзяцца дзве пары перапонак, з якіх дзве пярэднія перапонкі называюцца складкавымі (з-за складак), а дзве заднія — люстэркавымі, бо яны бліскучыя і гладкія. Бакавыя паражніны маюць збоку адтуліну, якая вядзе на паверхню цела. Ва ўнутранай сценцы гэтых паражнін устаўленая барабанная перапонка, да якой прымацоўваецца цягліца, якая прыводзіць перапонку ў ваганне. Сярэднія паражніны служаць у якасці рэзанатараў. У самак галасавы апарат рудыментарны, так што яны спяваць не могуць.