Франц Сераф Ленбах (з 1882 Франц фон Ленбах, ням. Franz Seraph Lenbach, Franz von Lenbach; 13 снежня 1836, Шробенхаўзен — 6 мая 1904, Мюнхен) — нямецкі жывапісец, адзін з ключавых прадстаўнікоў мюнхенскай школы.
Ленбах атрымаў вядомасць дзякуючы сваім рэалістычным партрэтам, напрыклад «Партрэт Ота фон Бісмарка». Творы Ленбаха прадстаўлены ў Гарадской галерэі ў доме Ленбаха, Музеі Ленбаха ў Шробенхаўзене і Эрмітажы.
У 1853 годзе Ленбах быў прыняты ў Мюнхенскую акадэмію мастацтваў. У 1860 годзе яго запрасілі ў новую мастацкую школу ў Веймары, дзе ён выкладаў да 1862 г. Да канца XIX у. Ленбах становіцца вядучым персанажам у жыцці мастацкага Мюнхена, а кола сяброў-мастакоў Ленбаха, у які ўваходзілі Вільгельм Буш, Франц Дэфрэгер і Рудольф Эп, дамінаваў у культурным жыцці горада.
Прызнаны і запатрабаваны вышэйшымі коламі грамадства партрэтыст, Ленбах дасягнуў багацця. Ён мог сабе дазволіць наняць архітэктара Габрыэля фон Зайдля для пабудовы сваёй вялізнай вілы ў 1887—1891 гадах, якая атрымала цяпер назву «Ленбаххаўс». Віла ў эклектычным стылі на аснове італьянскага Рэнесансу разам з садам па сваіх памерах можа параўнацца з невялікім замкам.
У наш час у «Ленбаххаўсе» знаходзіцца Гарадская галерэя ў доме Ленбаха. Апроч карцін Ленбаха і іншых мастакоў XIX ст. у галерэі размешчана значная калекцыя твораў мастацкай групы «Сіні вершнік».
Фон Ленбах пахаваны на Мюнхенскіх заходніх могілках.