Тасон Сімадзакі (сапраўднае імя - Харукі Сімадзакі, 17 лютага 1872, Ямагуты, прэфектура Нагана - 22 жніўня 1943, Оіса, прэфектура Канагава, Японія) — японскі паэт і пісьменнік, выбітны прадстаўнік японскага рэалістычнага рамана пачатку XX стагоддзя.
Разам з Такоку Кітамурай выдаваў літаратурны часопіс «Бунгакай». Унёс вялікі ўклад у развіццё натуралізму ў Японіі. У 1899 г. Сімадзакі разам з жонкай пераехаў са сталіцы ў глухую правінцыю. На працягу сямі гадоў працаваў выкладчыкам у адной з сельскіх школ на поўначы Японіі. За гэтыя гады ён досыць нагледзеўся на аднастайнае сельскае жыццё, якое стала пасля тэмай многіх яго твораў. У 1913 годзе Тасон Сімадзакі з’ехаў у Францыю, адкуль вярнуўся толькі ў 1916 годзе.