У Вікіпедыі ёсць артыкулы пра іншых асоб з прозвішчам Старобінец. Рыгор Лазаравіч Старобінец (14 мая 1910, г. Беразіно, Мінская вобласць — 10 лістапада 2001) — беларускі хімік. Член-карэспандэнт АН РБ (1969), доктар хімічных навук (1955), прафесар (1956), Заслужаны дзеяч навукі Беларусі (1980).
Пасля заканчэння Барысаўскага педагагічнага тэхнікума з 1929 г. працаваў настаўнікам у няпоўнай сярэдняй школе гарадскога пасёлка Халопенічы, Мінскай вобласці.
У 1932 г. паступіў на хімічны факультэт Беларускага дзяржаўнага ўніверсітэта, а пасля заканчэння навучання ў 1937 г. — у аспірантуру пры універсітэце па спецыяльнасці «фізічная і калоіднай хімія». За час навучання ў аспірантуры Старобінец выканаў арыгінальныя даследаванні ў галіне будовы адсарбцыйных слаёў у няводных асяроддзях.
Займаўся вывучэннем экстракцыйных працэсаў: тэрмадынамікі экстракцыі, экстракцыйнага падзелу і ачысткі прамыслова важных арганічных злучэнняў. Аўтар больш за 600 навуковых публікацый, больш за 60 аўтарскіх пасведчанняў.