Пунктэлія (Punctelia) — род ліставатых лішайнікаў сямейства пармелівых.
Слаявіна ліставатая, зверху шэрая, знізу бледная, дыяметр 3-10 см. Лопасці шырынёй да 6 мм, злёгку ўвагнутыя. Сарэдыі кропка- або шарападобнай формы. Саралі (утварэнні для вегетатыўнага размнажэння) развіваюцца ў цэнтры, часам па краях лопасцей. Пладовыя целы (апатэцыі) пераважна адзіночныя, трапляюцца рэдка. Сумкі 8-споравыя. Споры бясколерныя, амаль шарападобныя.
22 віды. Пашыраны ўсюды. На Беларусі 1 від — пунктэлія грубаватая (Punctelia subrudecta), занесена ў Чырвоную кнігу. Трапляецца ў вільготных лісцевых лясах на ствалах дрэў.