Нільс Руберг Фінзен (дацк.: Niels Ryberg Finsen; 15 снежня 1860, Торсхаўн — 24 верасня 1904, Капенгаген) — фарэрска-дацкі вучоны і фізіятэрапеўт. Нарадзіўся і правёў дзяцінства на Фарэрскіх астравах, дзе яго бацька, ісландзец па паходжанні, займаў пасаду амтмана — намесніка дацкай кароны. Распрацоўшчык навуковых асноў лячэння святлом. У 1903 годзе стаў першым дацкім лаўрэатам Нобелеўскай прэміі па фізіялогіі і медыцыне, «у знак прызнання яго заслуг у справе лячэння хвароб — асабліва ваўчанкі — з дапамогай канцэнтраванага светлавога выпраменьвання, што адкрыла перад медыцынскай навукай новыя шырокія далягляды»).