Мнагапёравыя (Polypteridae) — сямейства ганоідных рыб.
Даўжыня да 1,2 м. Цела падоўжанае, цыліндрападобнае. Луска ганоідная. Спінны плаўнік складаецца з асобных плаўнічкоў (да 18). Грудныя плаўнікі з мясістай лопасцю ў аснове. Плавальны пузыр вялікі, двухкамерны, часткова выконвае дыхальную функцыю.
Вядомы з эацэну (каля 40 млн г. назад). Адзінае сямейства атрада мнагапёрападобных, падзяляецца на 2 роды (мнагапёры і каламаіхты), 11 відаў. Пашыраны ў прэсных стаячых вадаёмах трапічнай Афрыкі.
Актыўныя ўначы. Кормяцца беспазваночнымі і рыбай.
Лічынкі з вонкавымі шчэлепамі.
Аб’ект промыслу.