Меланезі́йскія мовы — назва часткі аўстранезійскіх моў, распаўсюджаных у Меланезіі. Іх галоўнымі носьбітамі з’яўляюцца меланезійскія народы. Меланезійская моўная група вылучаецца не па генетычнаму, а этна-тэрытарыяльнаму прынцыпу. Усяго налічваюць каля 250 - 300 меланезійскіх моў.
Па граматычнай структуры і часткова лексічна блізкія да палінезійскіх моў, але адрозніваюцца ад іх большай архаічнасцю, вялікай колькасцю граматычных форм, суфіксаў і прэфіксаў, падзелам імён на класы, наяўнасцю поўных і скарочаных займеннікаў.