У Вікіпедыі ёсць артыкулы пра іншых асоб з прозвішчам Янг.
Кевін Кёртыс Янг (нар.16 верасня 1966) — амерыканскі лёгкаатлет, які спецыялізаваўся на дыстанцыі 400 метраў з бар’ерамі. У 1992 годзе стаў алімпійскім чэмпіёнам з сусветным рэкордам — 46,78.
Нарадзіўся ў Лос-Анджэлесе. Вучыўся ў Каліфарнійскім універсітэце, за які стаў двухразовым пераможцам нацыянальнай асацыяцыі. Дэбют на міжнароднай арэне пачаўся ў 1987 годзе на Панамерыканскіх гульнях, калі ён стаў сярэбраным прызёрам на дыстанцыі 400 метраў з бар’ерамі. На Алімпійскіх гульнях 1988 года заняў чацвёртае месца. На чэмпіянаце свету 1991 года ў Токіа заняў чацвёртае месца.
Галоўная перамога прыйшла да яго ў 1992 годзе на Алімпійскіх гульнях у Барселоне. У фінальным забегу на 400 метраў з/б 6 жніўня ён усталяваў новы сусветны рэкорд, які застаецца неперасягненым да цяперашняга часу. Янг пабіў рэкорд Эдвіна Мозеса.
Пасля трыумфу ў Барселоне ён выйграў чэмпіянат свету ў 1993 годзе. Больш поспехаў не дабіўся. У 2006 годзе быў залічаны ў залу славы лёгкаатлетаў ЗША.