Калона Дуруці (ісп.: Columna Durruti) — найбуйнейшае анархісцкае ўзброенае фарміраванне, якое існавала ў гады грамадзянскай вайны ў Іспаніі[1] і змагалася на баку Другой Іспанскай Рэспублікі. Калона ўжо за першыя месяцы вайны стала самым вядомым падраздзяленнем, што змагалася супраць Франсіска Франка і яго нацыяналістаў. Яна атрымала статус сімвала іспанскага анархісцкага руху і яго барацьбы. У складзе калоны змагаліся добраахвотнікі з розных краін свету. З 28 красавіка 1937 калона ў складзе 26-й дывізіі Народнай рэспубліканскай арміі. Названа ў гонар свайго камандзіра Буэнавентура Дуруці.