Зялёныя агні — чорна-белая сацыяльна-псіхалагічная дарама кінастудыі «Беларусьфільм». Прэм’ера адбылася 5 красавіка 1956 года. Сцэнарый: Аркадзь Маўзон. Рэжысёры: Сяргей Сплашноў і Іосіф Шульман. мастак Юрый Аляксандравіч Булычоў. Кампазітары: Дзмітрый Раманавіч Камінскі і Юрый Давыдавіч Бяльзацкі.
Дзеянне адбываецца на адным з чыгуначных вузлоў Беларусі. Малады машыніст грузавога цягніка Сяргей Чобур на свой страх і рызыку здзяйсняе першы рэйс з перавышэннем вагавой нормы. Падчас паездкі выяўляецца няспраўнасць машыны. Заняўшыся на хаду рамонтам, брыгада дапускае парушэнне правілаў тэхнічнай эксплуатацыі, і Чобура здымаюць з працы. Пры актыўным удзеле начальніка палітаддзела Якушава вопыт Чобура ўдаецца паспяхова паўтарыць, і Сяргея вяртаюць на паравоз. Гэтай акалічнасці больш за ўсё радуюцца дзве дзяўчыны-чыгуначніцы — інжынер Людміла і дыспетчар Аксана…