Жлобінскі замак. Існаваў y 15—17 стагоддзях y г. Жлобін Гомельскай вобласці.
Размяшчаўся на правым беразе Дняпра. Складаўся з уласна замка (60 х 50 м) і падзамка (130 х 60 м), размешчанага на 1,5—2 м ніжэй за замкавы дзядзінец. Увесь комплекс узвышаўся на 3—4 м над прырэчнай жылой зонай сярэдневяковага паселішча. Жлобінскі замак быў умацаваны земляным валам і драўлянымі сценамі-гароднямі з вежамі і брамамі.
У ліпені 1654 казакі ўкраінскага гетмана І.Н.Залатарэнкі ўзялі штурмам і спалілі «замок Злобян». Больш познія звесткі пра Жлобінскі замак не выяўлены.