Жан Кузен Старэйшы (фр. Jean Cousin l’Ancien; каля 1490/1500 — каля 1560, Парыж) — французскі жывапісец, скульптар, гравёр і разьбяр па дрэве, адзін з пачынальнікаў французскай школы жывапісу.
Пра яго жыццё захавалася мала інфармацыі. Спачатку Жан Кузен займаўся жывапісам на шкле і ўпрыгожыў ім вокны Санскага сабора, хоры ў царкве святога Гервасія, у Парыжы, і царкву Багародзіцы ў Вільневе-сюр-Іоне. Гэтыя і некаторыя іншыя працы ў тым жа родзе, якія прыпісваюцца Кузену, не пазбаўлены высакароднасці стылю і паказваюць развітую тэхніку аўтара. З яго карцін, напісаных алейнымі фарбамі, найбольш цікаўныя «Страшны Суд» (у Луўры, у Парыжы) і «Eva prima Pandora» (Луўр).
У 1560 годзе ён выдаў трактат аб перспектыве і ў 1571 годзе — сачыненне аб прапорцыях чалавечага цела і аб спосабах яго выявы ў розных палажэннях і ракурсах (La vraie science de la pourtraicture etc.).
Жана Кузена часта параўноўвалі з яго вялікім сучаснікам Альбрэхтам Дзюрэрам. Яго сын, Жан Кузен Малодшы, таксама вядомы мастак і аўтар вядомай кнігі «Кіраўніцтва па партрэтным жывапісе», навучаўся пры бацьку каб стаць мастаком, выявіў вялікі талент і хутка дасягнуў узроўня бацькі. Працы бацькі і сына часам не могуць адрозніць нават адмыслоўцы.