wd wp Пошук: ⬜

Гертруда фон Бабенберг

Гертруда фон Бабенберг (1120 — 4 жніўня 1150, Прага) — княгіня Чэхіі. Першая жонка Уладзіслава II, князя чэшскага з 1140 года, караля Чэхіі (1158—1173).

Нарадзілася ў сям’і маркграфа Аўстрыі Леапольда III Святога і Агнэсы фон Вайблінген, герцагіні Швабіі, дачкі Генрыха IV, імператара Свяшчэннай Рымскай імперыі.

Пляменніца імператара Свяшчэннай Рымскай імперыі Генрыха V. Яе сястра Агнэса фон Бабенберг была жонкай князь-прынцэпса Польшчы Уладзіслава II Выгнанніка.

Выйшла замуж за Уладзіслава II у 1140 годзе. У 1142 г. Гертруда разам з малодшым братам Уладзіслава Дэпальтам паспяхова абараняла замак на Пражскім Градзе ад паўсталых мараўскіх князёў Конрада II Зноемскага, Ураціслава II Брненскага і Атона III Дзетлеба, якія аблажылі яго. Тым часам Уладзіслаў, адсутнічаў у замку, таму што адправіўся ў Германію за падтрымкай да Конрада III, які дапамог свайму швагру вярнуць княства і ўтрымацца на прастоле.

Ад шлюбу з Уладзіславам II нарадзіліся дзеці:

Фрыдрых (Бедржых) (пам. 25 сакавіка 1189), князь чэшскі 1172—1173, 1178—1189, князь оламаўцкі 1169—1172
Агнэса (Анежка) (пам. 7 чэрвеня 1228), абатыса кляштара Святога Георга ў Празе ў 1224
Святаполк (пам. пасля 15 кастрычніка 1169)
Войцех (Адальберт) (пам. красавік 1203), архібіскуп зальцбургскі 1168—1174, 1183—1203
дачка; муж: Яраслаў Ізяславіч (каля 1132—1180), князь тураўскі 1146, наўгародскі 1148—1154, луцкі 1157—1178, вялікі князь кіеўскі 1174—1175

Па ініцыятыве Гертруды фон Бабенберг былі запрошаны ў краіну служкі новых каталіцкі манаскіх ордэнаў — прэманстранты і цыстэрцыянцы, а затым гаспітальеры. Для іх пры яе ўдзеле былі заснаваны Пласкі, Доксанскі і Страгаўскі кляштары ў Чэхіі.

Памерла пасля дзесяці гадоў шлюбу ва ўзросце 30 гадоў. Спачатку была пахавана ў Страгаўскім кляштары, а затым яе рэшткі былі перанесены ў Доксаны.

Зноскі

↑ (unspecified title) Праверана 7 жніўня 2020.
1 2 Lundy D. R. The Peerage
↑ (unspecified title) Праверана 26 верасня 2016.

Літаратура

Žemlička J. Čechy v době knížecí 1034—1198. Praha 2002.

Спасылкі

На Вікісховішчы ёсць медыяфайлы па тэме Гертруда фон Бабенберг
Gertruda Babenberská 1118(недаступная спасылка) (чэшск.)
Gertruda Babenberská