Барэнд Карнеліс Кукук (нідэрл. Barend Cornelis Koekkoek, 11 кастрычніка 1803, Мідэлбург — 5 красавіка 1862, Клевэ) — нідэрландскі мастак.
Нарадзіўся ў сям’і мастака-пейзажыста. Вывучаў жывапіс у Каралеўскай акадэміі выяўленчых мастацтваў у Амстэрдаме. Ужо ў маладосці пейзажы пэндзля Б. К. Кукука карысталіся папулярнасцю. У 1833 годзе мастак ажаніўся з дачкой свайго настаўніка і сябра Ж. А. Дайвайла, Элізай Тэрэзай; у гэтым шлюбе нарадзіліся 5 дачок. Будучы прызнаным жывапісцам, Б. Кукук заслужыў у Нідэрландах тытул «князь мастакоў». У 1834 годзе ён пераехаў у Клевэ, і ў 1841 годзе адкрыў у гэтым горадзе сваю мастацкую акадэмію і школу малявання, якая прыцягнула да сябе ўвагу многіх нідэрландскіх жывапісцаў. У 1842—1848 гадах ён пабудаваў у цэнтры Клевэ «Палац мастакоў» з майстэрні (Дом Кукук). Будынак, пабудаваны ў стылі нідэрландскага рамантызму, з’яўляецца цяпер мастацкім музеем і адным з найпрыгажэйшых архітэктурных помнікаў сярэдзіны XIX стагоддзя ў нямецкім Рэйнландзе і прылеглых да яго раёнах Нідэрландаў.
Пасля смерці мастака заснаваную ім Акадэмію мастацтваў узначаліў вучань Кукука і таксама таленавіты пейзажыст Іаган Бернгард Кломбек.