У Вікіпедыі ёсць артыкулы пра іншых асоб з прозвішчам Ігнаценка.
Аляксандр Пятровіч Ігнаценка (10 лютага 1932, в. Студзянец, Клімавіцкі раён, БССР — 24 мая 1998, Мінск) — беларускі гісторык. Доктар гістарычных навук (1978), прафесар (1980).
Скончыў гістарычны факультэт БДУ (1955), аспірантуру (1958). У 1963 абараніў кандыдацкую дысертацыю. Выкладчык, намеснік дэкана завочнага і гістарычнага факультэтаў (1966—1978), загадчык кафедры гісторыі Беларусі (1990—1994), прафесар БДУ.
Адзін з першых, хто ў пасляваенны час звярнуўся да дасавецкага перыяду ў вывучэнні гісторыі Беларусі: прапанаваў аналіз рускай дваранскай і буржуазнай гістарыяграфіі, польскай гістарыяграфіі, вылучыў аспект «фальсіфікацыя гісторыі Беларусі беларускімі буржуазнымі нацыяналістамі».