У Вікіпедыі ёсць артыкулы пра іншых асоб з прозвішчам Елсукоў. Альберт Мікалаевіч Елсуко́ў (9 снежня 1936 — 6 сакавіка 2014) — беларускі сацыёлаг і філосаф. Доктар філасофскіх навук (1985), прафесар (1988). Спецыяліст у галіне гісторыі і метадалогіі навукі, тэорыі і гісторыі сацыялогіі.
Нарадзіўся ў Архангельску. У 1963 годзе скончыў гістарычны факультэт Беларускага дзяржаўнага універсітэта імя У. І. Леніна, у 1969 — аспірантуру філасофскага факультэта МДУ ім. М. В. Ламаносава, дзе падрыхтаваў і абараніў кандыдацкую дысертацыю на тэму «Праблема тлумачэння ў сацыяльна-гістарычным даследаванні».
З 1973 г. на выкладчыцкай працы ў БДУ. У 1985 абараніў доктарскую дысертацыю па тэме «Метадалагічныя праблемы фарміравання навуковага факту», з 1988 — прафесар. У гэтым жа годзе ён быў прызначаны загадчыкам кафедры марксісцка-ленінскай філасофіі прыродазнаўчых факультэтаў БДУ.
У 1989—1997 гг. — дэкан новастворанага філасофска-эканамічнага факультэта БДУ, адначасова ў 1989—2003 — загадчык кафедры сацыялогіі БДУ, у 2003—2014 — прафесар гэтай кафедры.
Член Вышэйшага кансультатыўнага савета Беларускага грамадскага аб’яднання «Сацыялагічнае таварыства», член Міжнароднага рэдакцыйнага савета навукова-тэарэтычнага часопіса «Сацыялогія», член рэдкалегіі часопіса «Гуманітарна-эканамічны веснік», член Дзяржаўнай камісіі па ліцэнзаванню сацыялагічных даследаванняў.
Навуковыя інтарэсы А. М. Елсукова былі звязаныя з праблемамі гісторыі і метадалогіі навуковага пазнання, тэорыі і гісторыі сацыялогіі.
Пры непасрэдным удзеле А. М. Елсукова ў 1989 у БДУ быў адкрыты філасофска-эканамічны факультэт (з 1999 — факультэт філасофіі і сацыяльных навук БДУ), а пры яго непасрэдным удзеле — першая ў рэспубліцы кафедра сацыялогіі. Гэта дало пачатак інстытуцыяналізацыі ўніверсітэцкай сацыялагічнай навукі ў Беларусі.
Пад кіраўніцтвам і пры непасрэдным удзеле А. М. Елсукова быў ажыццёўлены праект «ТЭМПУС», вынікам якога стала адкрыццё новага аддзялення на факультэце філасофіі і сацыяльных навук БДУ — аддзялення сацыяльнай камунікацыі і кафедры сацыяльнай камунікацыі. А. М. Елсукоў сфарміраваў навуковую школу ў галіне метадалогіі і гісторыі сацыялагічных ведаў, падрыхтаваў больш за 20 кандыдатаў навук.