Алашская аўтаномія (каз.: Алаш Орда; 1917—1920) — казахскае аўтаномнае дзяржаўнае ўтварэнне, якое існавала ў пачатку XX стагоддзя на тэрыторыі сучаснага Казахстана пад кіраўніцтвам урада, які зваўся «Алаш Арда». Алашская аўтаномія была абвешчана партыяй «Алаш» і заснавана Агульна-кіргізскім (агульна-казахскім) з’ездам у Арэнбургу 5-13 снежня 1917 года. Ліквідавана бальшавіцкім Вайскова-рэвалюцыйным камітэтам па кіраванні Кіргізскім краем 5 сакавіка 1920 года.