wd wp Пошук:
    ⬜

    Мікола Шабовіч

    Мікола Шабовіч (Мікалай Віктаравіч Шабовіч; 4 студзеня 1959, вёска Бадзені, Мядзельскі раён, Мінская вобласць — 16 лістапада 2021) — беларускі паэт, паэт-перакладчык, філолаг і педагог.

    Кандыдат філалагічных навук (2004), дацэнт (2008).

    Біяграфія

    Адукацыя

    У 1966—1974 гг. вучыўся ў сярэдняй школе ў вёсцы Дзягілі Мядзельскага раёна Мінскай вобласці. У 1974—1976 гг. вучыўся і скончыў сярэднюю школу № 1 горада Мядзел[2].

    У 1977—1981 г. вучыўся і скончыў філалагічны факультэт (беларускае аддзяленне) Мінскага дзяржаўнага педагагічнага інстытута імя Максіма Горкага па спецыяльнасці «Беларуская мова і літаратура». На першым курсе інстытута выкладчыкам у Міколы Шабовіча быў вядомы мовазнавец Фёдар Міхайлавіч Янкоўскі[3].

    Працоўная дзейнасць

    Працаваў у 1981—1986 гг. настаўнікам беларускай мовы і літаратуры ў Шыпкоўскай васьмігадовай школе Вілейскага раёна.

    Пасля заканчэння аспірантуры (1989) выкладаў з 1989 года[1] беларускую мову ў Беларускім дзяржаўным педагагічным універсітэта імя Максіма Танка (БДПУ). Па сумяшчальніцтве ў 1992—2002 гг. працаваў загадчыкам літаратурна-драматычнай часткі Мінскага абласнога драматычнага тэатра ў Маладзечне.

    Абараніў кандыдацкую дысертацыю на тэму «Аказіянальныя словы ў беларускіх мастацкіх тэкстах 20-х гадоў ХХ стагоддзя» і атрымаў навуковую ступень кандыдата філалагічных навук (2004). У 2008 годзе атрымаў вучонае званне дацэнта.

    Да смерці працаваў на пасадзе дацэнта кафедры беларускага мовазнаўства Беларускага дзяржаўнага педагагічнага ўніверсітэта імя Максіма Танка, а таксама на пасадзе дацэнта кафедры сучасных еўрапейскіх моў БНТУ[4]. Даследаваў аказіянальную лексіку ў мастацкіх тэкстах. Аўтар больш як 50 навуковых артыкулаў і манаграфіі «Аказіянальныя словы ў беларускіх мастацкіх тэкстах 20-х гадоў ХХ стагоддзя» (2013). Сфера навуковых інтарэсаў — лексікалогія і дэрываталогія.

    Памёр 16 лістапада 2021 года ад наступстваў COVID-19[5].

    Творчасць

    Мікола Шабовіч у час афіцыйнай прэзентацыі сваёй кнігі «Прыколы ад Міколы» на XXII Міжнароднай кніжнай выстаўцы ў Мінску (Беларусь), 14 лютага 2015 г.

    Ствараў вершы на беларускай мове. Першы верш Міколы Шабовіча быў надрукаваны ў 1976 годзе ў раённай газеце «Нарачанская зара»[1]. Свой першы зборнік вершаў «Сэрцатрасенне» аўтар падаў у выдавецтва «Мастацкая літаратура» ў 1980-я гг., але з-за адмоўнай рэцэнзіі Рыгора Яўсеева зборнік не быў надрукаваны тады, што сам Шабовіч пазней прызнаў за рацыянальнае[3]. Сваю першую падборку з 17 вершаў пад назвай «Каб вымавіць: „Люблю!“» Мікола Шабовіч апублікаваў у калектыўным зборніку «Крыло» (1984)[3].

    Аўтар паэтычных зборнікаў:

    Паэзія Міколы Шабовіча — лірычна-філасофская. Яна акумулюе як трагедыйнасць нашага часу, так і імгненні шчасця, радасць жыць і тварыць на роднай зямлі. Галоўная тэма яго творчасці — гэта тэма кахання, светлае пачуццё да жанчыны. Акрамя таго паэт напісаў шмат прачулых вершаваных твораў пра свой родны Мядзельскі край, яскравыя літаратурныя пародыі, эпіграмы і прысвячэнні сваім калегам па пяру[6][7], гумарыстычныя вершы.

    На вершы Міколы Шабовіча напісана больш як 180 песень, якія выконвалі Ірына Дарафеева, Алеся Гайдук, Алег Цівуноў, Дзмітрый Мінько і іншыя[7]. Некаторыя з іх гучалі на Нацыянальным фестывалі беларускай паэзіі і песні ў Маладзечне і Міжнародным фестывалі мастацтваў «Славянскі базар у Віцебску». З песняй «Я чакаю цябе» (словы Міколы Шабовіча, музыка Алены Атрашкевіч) Таццяна Валахановіч перамагла ў 2015 годзе на конкурсе маладых выканаўцаў у рамках Нацыянальнага фестывалю беларускай паэзіі і песні ў Маладзечне. 30 песень на вершы Міколы Шабовіча напісаў кампазітар Мікалай Яцкоў[3]. Песня «Пад небам Радзімы» (словы Міколы Шабовіча, музыка Дзмітрыя Пятровіча) з 2017 г. увайшла ў рэпертуар Нацыянальнага акадэмічнага народнага хору Рэспублікі Беларусь імя Г. І. Цітовіча (Беларусь)[7].

    Мікола Шабовіч — аўтар слоў гімна (2014) Беларускага дзяржаўнага педагагічнага ўніверсітэта імя Максіма Танка. Спрыяў развіццю маладых беларускіх паэтаў і празаікаў — удзельнікаў літаратурнай суполкі «Крокі».

    Са снежня 1998 года быў членам Саюза беларускіх пісьменнікаў[3], а пасля Саюза пісьменнікаў Беларусі, дзе ў апошнія гады жыцця быў членам праўлення[8] Саюза і старшынёй бюро секцыі сатыры і гумару[7]. Член Беларускага саюза тэатральных дзеячаў з 2000 года.

    Паэтычныя пераклады

    У апошнія гады жыцця актыўна працаваў як перакладчык. Перакладаў на беларускую мову творы рускіх паэтаў — Аляксандра Блока, Сяргея Ясеніна, Канстанціна Бальмонта, Ігара Грыгор’ева, Мікалая Рубцова, Анатоля Аўруціна, Юрыя Фатнева, Валянціны Паліканінай, Таццяны Лейкі і інш.

    Узнагароды

    Навуковыя публікацыі

    Кнігі

    Артыкулы

    Літаратура

    Зноскі

    1. 1 2 3 Николай Викторович Шабович
    2. ↑ Паводле інфармацыі з сацыяльнай сеткі. Гл.: акаунт Міколы Шабовіча ў сацыяльнай сетцы (другі) // ok.ru
    3. 1 2 3 4 5 Мікола Шабовіч: ПАЦЕРКІ ЎСПАМІНАЎ Архівавана 11 красавіка 2017.
    4. ↑ Шабович Николай Викторович Архівавана 1 мая 2017.
    5. ↑ Аксана Ярашонак Памёр паэт, ураджэнец Мядзельшчыны Мікола Шабовіч (нявызн.) (недаступная спасылка). rh.by (17 лістапада 2021). Архівавана з першакрыніцы 17 лістапада 2021. Праверана 17-11-2021.
    6. ↑ Навінкі беларускай літаратуры
    7. 1 2 3 4 5 Творчая імпрэза паэта Міколы ШАБОВІЧА «Я да цябе прапісаны, мой край!»
    8. ↑ МУЗА В ТЕХНИЧЕСКОМ ИНТЕРЬЕРЕ Архівавана 25 лютага 2018.
    9. ↑ Памятная медаль «Поэт и воин Игорь Григорьев (1923—1996)»

    Спасылкі

    Тэмы гэтай старонкі (21):
    Выкладчыкі БДПУ імя Максіма Танка
    Члены Саюза пісьменнікаў Беларусі
    Члены Саюза беларускіх пісьменнікаў
    Асобы
    Нарадзіліся ў 1959 годзе
    Філолагі Беларусі
    Перакладчыкі Беларусі
    Нарадзіліся 4 студзеня
    Памерлі ад каранавіруснай інфекцыі COVID-19
    Паэты Беларусі
    Выпускнікі БДПУ імя Максіма Танка
    Беларускамоўныя паэты
    Члены Беларускага саюза тэатральных дзеячаў
    Пісьменнікі паводле алфавіта
    Лаўрэаты прэміі «Залаты Купідон»
    Памерлі ў 2021 годзе
    Вікіпедыя:Асобы, якія памерлі менш за год таму
    Выкладчыкі БНТУ
    Памерлі 16 лістапада
    Вікіпедыя:Артыкулы з непрацоўнымі спасылкамі
    Нарадзіліся ў Мядзельскім раёне