Санкт-Пецярбургскі будыйскі храм «Дацан Гунзэчойнэй» (тыб. ཀུན་བརྩེ་ཆོས་གནས་གྲྭ་ཚང, Вайлі kun brtse chos gnas grwa tshang; Гунзэчойнэй у перакладзе з тыбецкай — крыніца святога вучэння Усеспачывальнага [Уладыкі-пустэльніка], дацан — у расійскім будызме азначае манастыр) — культавы будынак у Санкт-Пецярбургу. Адносіцца да Будыйскай традыцыйнай сангхі Расіі, школа гелугпа.
Знаходзіцца па адрасе: Санкт-Пецярбург, Прыморскі праспект, 91 (станцыя метро «Старая Дзярэўня»). Пабудаваны ў 1905—1915 гадах архітэктарам Гаўрыілам Бараноўскім па ініцыятыве далай-ламы і пры кансультацыі вучоных-усходазнаўцаў, мастакоў В. В. Радлава, С. Ф. Ольдэнбурга, Ф. І. Шчарбацкага, М. К. Рэрыха.