Марыя Аляксандраўна Фалалеева (нар. 5 верасня 1976, Віцебск) — беларуская грамадская дзеячка. Старшыня Цэнтральнага Савета Міжнароднага грамадскага аб’яднання «Экапраект» [1] , кандыдат геаграфічных навук. Спецыяліст у галіне экалагічнай і кліматычнай палітыкі, устойлівага развіцця гарадоў, партнёрскага кіравання.
Нарадзілася 5 верасня 1976 года ў горадзе Віцебск. Скончыла сярэднюю школу № 37 г. Віцебска ў 1993 годзе. Вучылася на геаграфічным факультэце Беларускага дзяржаўнага ўніверсітэта, ва Універсітэце Лунда (Швецыя). У 2004 годзе абараніла кандыдатскую дысертацыю на тэму «Прасторавая структура гарадскіх ландшафтаў і ацэнка іх экалагічнага патэнцыяла: на прыкладзе горада Мінск». З 2006 года працавала ў міжнародных даследчых цэнтрах — Інстытут экалагічных даследванняў (IVM VU, Амстэрдам, Нідэрланды), Цэнтр экалагічных даследванняў (UFZ, Ляйпцыг, Германія), Цэнтр марскіх і прыбярэжных даследванняў (CMRC UCC, Корк, Ірландыя). Больш 15 гадоў займаецца навуковымі даследваннямі і практычнымі праектамі па распрацоўцы методык і планаў кліматычнай адаптацыі, устойлівага гарадскога развіцця [2] , ацэнкі эфектыўнасці экалагічных палітык і праектаў [3] . Праводзіла даследванні ў Нідэрландах, Велікабрытаніі, Венгрыі, Ірландыі, краінах Усходняй Еўропы. Аўтар навуковых публікацый, адукацыйных курсаў і трэнінгаў у сферы зменаў клімату [4] , экалагічнай палітыкі і інавацый [5] , удзелу зацікаўленых бакоў, экалогіі гарадоў [6] . Эксперт нацыянальнай дэлегацыі Рэспублікі Беларусь на Канферэнцыях Бакоў Рамкавай Канвенцыі ААН аб зменах клімату (РКЗК ААН) у Парыжы (2015) і Катовіцэ (2018). Працавала ў праектах ЕС, ПРААН, SIDA, СAN [7] , 350.org, КОМГОР [8] .