Луіза (Лавіса) Катарына Хамарстрэм (швед. Lovisa (Louise) Katarina Hammarström, 25 мая 1849 — 5 лістапада 1917) — шведскі хімік. Першая жанчына ў Швецыі, якая атрымала спецыялізаваную адукацыю па хіміі.
Нрадзілася ў парафіі Хошэ (швед. Hosjö församling) Даларна. Яе бацька быў святаром, меў медыцынскую адукацыю. Яна асірацела яшчэ ў раннім узросце.
Цікавасць Луізы Хамарстрэм да хіміі з’явілася яшчэ ў дзяцінстве дзякуючы зносінам з хімікамі, што працавалі на металургічнай вытворчасці. У далейшым яна была студэнткай ў Стакгольмскім універсітэце Констфак, брала прыватныя ўрокі па хіміі, а ў другой палове 1870 гадоў працавала асістэнтам ў лабараторыі Вернера Кронквіста, выконвала аналізы на мыш’як. Затым яна працавала хімікам-мінералогам на прадпрыемствах Бонгбра (1881—1887), Фагерсты (1887—1891), Шысхютана (1893).
У 1893 годзе, праз 18 гадоў працы асістэнткай, яна адкрыла ўласную лабараторыю ў Капарбергу (цяпер лен Даларна) і працавала ў галіне мінералогіі і геалогіі. Тут яна ў асноўным даследавала руды, металы і хімічныя рэчывы, у прыватнасці, праводзіла агульны хімічны аналіз. Яе асістэнткамі былі Эльса Кронквіст, верагодна, дачка Вернера Кронквіста, і Марыя Лейдстрэм. Усяго прыватная лабараторыя Луізы Хамарстрэм за 16 гадоў выканала 29 тысяч аналізаў.
Луіза Хамарстрэм памерла ў Стакгольме ў 1917 годзе.