Жужа́ла[1] (Bombyliidae) — сямейства насякомых атрада двухкрылыя (Diptera).
Даўжыня цела складае ад 0,8 да 30 мм. Цела з шырокім кароткім брушкам, укрытае густымі валаскамі альбо лусачкамі, стракатае, з металічным бляскам. Вусікі з канцавым прыдаткам. Хабаток доўгі. Крылы празрыстыя, стракатыя.
Усяго налічваецца звыш 5000 відаў. Распаўсюджаныя шырока, у асноўным у сухіх трапічных і субтрапічных зонах. Выкапнёвыя рэшткі вядомыя з сярэдняй юры. На Беларусі адзначана каля 30 відаў.
Лічынкі — драпежнікі і паразіты жукоў, перапончатакрылых, саранчовых, некаторыя — звышпаразіты, напр. саміх жужалаў. Дарослыя кормяцца нектарам.
Развіццё з поўным ператварэннем. Адна генерацыя за год. Зімуюць спелыя лічынкі пераважна ў глебе.