Ева Багэ (швед. Eva Bagge; 15 снежня 1871-1964) — шведская мастачка.
Нарадзілася 15 снежня 1871 года ў Стакгольме ў сям’і Пера Олафа Багэ і яго жонкі Хенрыкі Атыліяны фон Фіянт; стрыечная сястра мастачкі Элізабет Багэ.
Вучылася жывапісу ў Каралеўскай акадэміі свабодных мастацтваў у Стакгольме ў Георга фон Розена і Густава Цэдэрстрома ў 1892—1895 гадах. Таксама некаторы час вучылася ў Асацыяцыі мастакоў (Konstnärsförbundets skola). У 1896 года Ева здзейсніла вучэбную паездку ў Рым, а ў 1897 годзе — у Парыж і Брэтань. Працягнула сваю адукацыю ў Акадэміі Каларосі і ў 1898 годзе вярнулася ў Швецыю.
Свайго максімальнага поспеху ў якасці мастака Ева дасягнула ў познім узросце, калі была прадстаўлена на стакгольмскай выставе ў Gösta Stenmans Galleri ў 1941 годзе.
Работы мастачкі прадстаўленыя ў Нацыянальным музеі Швецыі і ў Музеі сучаснага мастацтва ў Стакгольме, у Гётэбаргскім мастацкім музеі, Норчэпінгскім мастацкім музеі, а таксама музеях Мальмё, Эскільстуна, Ямтлі і іншых.
Памерла ў 1964 годзе ў Стакгольме і была пахавана на Паўночных могілках.