Дубаўскае — возера ў Ганцавіцкім раёне Брэсцкай вобласці, за 9 км на поўдзень ад горада Ганцавічы, за 2 км на паўночны захад ад вёскі Люсіна, каля ўрочышча Задні Бор. Адносіцца да басейну ракі Цна.
Плошча паверхні 0,178 км², даўжыня 0,63 км, шырыня 0,38 км. Найбольшая глыбіня 2,9 м, сярэдняя 1,65 м. Даўжыня берагавой лініі 1,7 км. Аб’ём вады 0,29 млн м³.
Берагі пясчаныя, пераважна высокія, параслі лесам і хмызняком. Зарастае слаба. Дно выслана глеем і сапрапелем.
У возеры водзяцца лінь, карась, акунь, шчупак і іншыя віды рыб.
За 1 км на паўднёвы ўсход знаходзіцца возера Чырвонае.