Тхуптэ́н Г’яцо́ (тыб.: ཐུབ་བསྟན་རྒྱ་མཚོ་, вайлі: thub bstan rgya mtsho; 27 мая 1876[1] — 17 снежня 1933) — трынаццаты Далай-лама, духоўны і свецкі кіраўнік Тыбета ў 1895—1933 гадах. Ва ўнутранай палітыцы праявіў сябе як выдатны рэфарматар, у знешняй — як майстар дыпламатыі, змагар за незалежнасць сваёй краіны. У перыяд яго праўлення Тыбет з’яўляўся суверэннай дзяржавай.
Далай-лама XIII таксама вядомы як найважнейшая фігура цэнтральнаазіяцкай часткі «Вялікай гульні» — дыпламатычнага і ваеннага супрацьстаяння Расіі, Брытаніі і цынскай імперыі канца XIX — пачатку XX стагоддзяў, у якой ён доўгі час падтрымліваў расійскі бок[2].