Бая́рышніца (Aporia crataegi) — матыль сямейства бялянак.
Крылы (размах 50—60 мм) белыя з чорнымі жылкамі. Вусені (даўжыня да 45 мм) буравата-шэрыя.
Пашырана ва ўмераных, часткова паўночных паясах Еўропы і Азіі, у Паўночнай Амерыцы. На Беларусі жыве ў лясах, садах, парках, часта шкодзіць ім.
Лёт у маі—чэрвені. Вусені паяўляюцца ў ліпені, аб’ядаюць лісце пладовых дрэў, зімуюць у коканах, вясною выядаюць пупышкі, лісце, бутоны і кветкі дрэў.
Меры барацьбы: збор і спальванне зімовых гнёздаў, апрыскванне дрэў інсектыцыдамі.