Барыс Ігаравіч Звозскаў (26 лютага 1949 — 17 чэрвеня 2012) — беларускі праваабаронца, грамадскі дзеяч, першы прэзідэнт Беларускага дома правоў чалавека (Вільнюс, Літва, 2007—2010), адзін з заснавальнікаў аб’яднанняў «Хельсінкі ХХI» і «Прававая ініцыятыва», лаўрэат прэміі «Праваабаронца года Беларусі» (2008).
Барыс Звозскаў нарадзіўся 26 лютага 1949 года ў Белагорску (Расія), скончыў Ленінградскі электратэхнічны інстытут. З 1996 года займаўся праваабарончай дзейнасцю, практычнай абаронай у палітычна матываваных судовых працэсах, удзельнічаў у экспертызе шэрагу законапраектаў, з 1998 года займаўся прававой асветай у сферы праваабароны, быў сярод актыўных удзельнікаў працэсу стварэння і развіцця Беларускага дома правоў чалавека, у 2007—2010 гадах з’яўляўся прэзідэнтам Дома правоў чалавека. Памёр у ночь з 16 на 17 чэрвеня 2012 года ў рэанімацыі анкалагічнага цэнтра ў Бараўлянах.
31 ліпеня 2013 года была афіцыйна зацверджаная назва Беларускага Дома правоў чалавека ў Вільнюсе — Беларускі дом правоў чалавека імя Барыса Звозскава.