Балгарская камуністычная партыя — камуністычная партыя ў Балгарыі, кіруючая партыя ў краіне ў 1948—1990 гадах. Узнікла ў маі 1919 годзе ў выніку перайменавання Балгарскай рабочай сацыял-дэмакратычнай партыі (цесных сацыялістаў) у Балгарскую камуністычную партыю (БКП). У 1924 годзе партыя была забароненая і дзейнічала нелегальна. У 1927 пад кантролем камуністаў была створана легальная Рабочая партыя (РП), якая дапускала падвойнае сяброўства. У 1939 БКП і РП аб’ядналіся ў Балгарскую рабочую партыю (камуністаў).
Пасля другой сусветнай вайны, у 1948 годзе, партыя аб’ядналася з Балгарскай рабочай сацыял-дэмакратычнай партыяй (шырокіх сацыялістаў) і была перайменавана ў Балгарскую камуністычную партыю. У гэтым жа годзе, БКП дамаглася дамінуючага ўплыву ў Вялікім народным сходзе Балгарыі, стаўшы фактычна кіруючай партыяй у краіне.
У 1990, з адменай арт. 1 канстытуцыі Балгарыі, якая абвяшчала БКП кіруючай сілай у грамадстве і дзяржаве, партыя пазбавілася манаполіі на ўладу. У гэтым ж годзе ў адпаведнасці з агульнапартыйным рэферэндумам, партыя была ператворана ў Балгарскую сацыялістычную партыю.