Юрый Міхайлавіч Брайдэр (8 студзеня 1948, Орша — 8 лютага 2007, Мінск) — беларускі пісьменнік-фантаст.
Нарадзіўся ў Оршы, а ўсё сваё жыцце пражыў у Дзяржынску. Скончыў Мінскі тэхнікум сувязі.
Працаваць у службе «Ахова» раённага аддзела ўнутраных спраў. Даслужыўся да звання маёра міліцыі і выйшаў у адстаўку.
Першая спроба пісаць была зроблена яшчэ ў дзяцінстве. Першымі апавяданнямі былі «Нарушитель» і «Индейка». Друкаваўся ў газеце «Знамя юности», часопісах «Рабочая змена», «Неман».
У 1987 годзе разам з Мікалаем Чадовічам выпусціў кнігу «Пасёлак на краю Галактыкі», якая была ўдастоена прэміі Ленінскага камсамола Беларусі. У творах Ю. Брайдэра і М. Чадовіча спалучаюцца інтарэс да парадаксальнага сюжэту, жыццевая назіральнасць пісьменнікаў-рэалістаў, талент сатырыкаў.
Неаднаразова з’яўляўся ўдзельнікам семінараў пісьменнікаў-фантастаў у Санкт-Пецярбурзе, Ялце, Краснаярску. Многія творы пісьменніка трапілі ў спіс намінантаў на літаратурныя прэміі ў вобласці фантастыкі «Бронзовая улитка», «Интерпрескон», «Странник».
Кнігі Ю. Брайдэра выходзяць тыражамі 12-15 тысяч экзэмпляраў. Яны пераведзены на многія мовы свету.
У 1994 годзе за кнігу «Стрэлы Перуна з раздзяляючымі боегалоўкамі» у Прыднястроўі яны атрымалі першую прэмію.
З 1996 года з’яўляўся членам журы прэстыжнага кангрэса фантастаў Расіі «Странник». Ён з’яўляецца лаўрэатам прэміі «Меч Руматы» за раман «Между плахой и секирой» (1998). У 2003 годзе на міжнародным фестывалі фантастыкі «Звездный мост — 2003» яго раман «Гвоздь в башке» стаў лаурэатам у намінацыі «Крупная форма», ён быў лепшым сярод 94 раманаў; на 8 кангрэсе фантастаў Расіі гэты раман атрымаў прэмію «Меч в зеркале». У гэтым жа годзе перамог у конкурсе «Эпіграма-Ф».