Уільям Дампір (1651, Іст-Кокер, Англія — сакавік 1715, Лондан) — англійскі мараплавец, пірат. Здзейсніў тры кругасветныя падарожжы. Некалькі гадоў правёў на в. Тарцю (на поўнач ад Гаіці ) у Вест-Індыі (галоўная база піратаў у Атлантыцы); удзельнічаў у рабаванні іспанскіх гарадоў і паселішчаў на берагах Амерыкі. Плаваў да берагоў паўночна-заходняй Аўстраліі, дзе адкрыў групу астравоў (а-вы Дампіра) і шмат дробных астравоў. Склаў апісанні і карты для паўднёвых раёнаў Ціхага акіяна. Імем Дампіра названа некалькі астравоў і праліваў у паўднёва-заходняй частцы Ціхага акіяна і ў Малайскім архіпелагу.