Саюз вызвалення — нелегальнае палітычнае аб’яднанне ліберальнай інтэлігенцыі ў Расіі ў 1904—1905 гг. Заснаваны ў студзені 1904 г. на базе групоўкі ўтворанай вакол часопіса «Вызваленне». Дзейнічаў у кантакце з Саюзам земцаў канстытуцыяналістаў, у лістападзе 1904 г. выступіў арганізатарам «банкетнай кампаніі» (120 палітызаваных банкетаў у 34 гарадах, удзельнікі якіх патрабавалі ад урада ўвядзення народнага прадстаўніцтва і палітычных свабод) і нелегальных земскіх з’ездаў. Праграма (красавік 1905 г.) прадугледжвала ўвядзенне ў Расіі канстытуцыйнай манархіі, усеагульнага выбарчага права, частковае надзяленне сялян зямлёй. Члены саюза восенню 1905 г. склалі ядро Канстытуцыйна-дэмакратычнай партыі.