Рэвалюцыя на граніце (або Студэнцкая рэвалюцыя на граніце) — кампанія шырокамаштабных акцый негвалтоўнага грамадзянскага непадпарадкавання, загадзя арганізаваная ўкраінскай моладдзю, пераважна студэнтамі. Пратэсты працягваліся з 2 па 17 кастрычніка 1990 года ва УССР. Стрыжнем пратэстных падзей была студэнцкая галадоўка на плошчы Кастрычніцкай рэвалюцыі ў Кіеве (цяперашні Майдан Незалежнасці). Пратэсты завяршыліся падпісаннем пастановы Вярхоўнай Рады УССР, якая гарантавала выкананне патрабаванняў пратэстуючых.